Պերֆորմանսի սյուժեն հիմնված է հեղինակի գրած աբսուրդի գրական ստեղծագործության վրա։ Գործողությունները ծավալվում են գետնախնձորի աշխարհում, որտեղ գոյություն ունեն անդեմ էակներ։ Այս խորհրդանշական միջավայրում մարմինը դառնում է պատմողը՝ բացահայտելով մարդու ներաշխարհը, նրա հիշողությունները, ցավն ու վերափոխումը։ Ներկայացման հիմնական գաղափարն այն է, որ կյանքի ընթացքում մարդը ձեռք է բերում բազմաթիվ հոգևոր և հուզական սպիներ։ Ժամանակի ընթացքում դրանք այնքան են շատանում, որ նա ստիպված է անցնել «մաշկազերծման» ցավոտ, բայց անհրաժեշտ ճանապարհը՝ աստիճանաբար ազատվելով կուտակված սպիերից և վերածնվելով նոր մաշկով ու նոր ինքնությամբ։ Մարմնի շարժումը, տարածությունը, լույսը և երաժշտությունը միավորվում են՝ ստեղծելով աբսուրդի և խորհրդանիշների վրա հիմնված բեմական լեզու։