Մշակութային գործիչ, գեղանկարիչ, գրաֆիկ, գրքի ձևավորող և մոնումենտալ երկերի հեղինակ Գրիգոր Խանջյանի (1926–2000) ծննդյան 100-ամյակին նվիրված հոբելյանական ցուցահանդես, որը ներկայացնում է նկարչի ստեղծագործությունը ամենալայն ընդգրկմամբ՝ բացահայտելով նրան որպես իր ժամանակի և հայոց պատմության տարբեր էջերը վկայագրող արվեստագետի: Ցուցահանդեսում ընդգրկված են տարբեր տարիների գեղանկարչական ու գրաֆիկական աշխատանքներ, ճամփորդական էտյուդներ, գրքային նկարազարդումներ և նրա էսքիզներով ստեղծված կիրառական արվեստի նմուշներ։ Առաջին անգամ հանրությանն է ներկայացվում Խանջյանի ազգային-եկեղեցական մոնումենտալ շարքի առաջին աշխատանքը՝ Մայր Աթոռ Սուրբ Էջմիածնում պահվող «Լուսավորչի տեսիլքը» գոբելենը, ինչպես նաև կրոնական թեմաներով մի շարք մեծադիր էսքիզներ։ Համադրողներ՝ Սեդա Խանջյան, Հայկուհի Սահակյան: Մուտքը՝ պատկերասրահի տոմսով: