Գեներատիվ արհեստական բանականության հայտնությունը գոյաբանական հարցեր է առաջացրել մարդկային փորձառության ապագայի վերաբերյալ։ «Ճնշման ցուցիչ» ինստալյացիայում միջգիտակարգային արվեստագետ Սոնա Աբգարյանն անդրադառնում է այս անորոշություններին արհեստական բանականությամբ գեներացված վիդեոյի, գեղանկարչության և քանդակի միջոցով։ Հենվելով հոլիվուդյան կինոյի, բարոկկո գեղանկարչության, գովազդային լուսանկարչության և տեսախաղերի պատկերային լեզվի վրա՝ Աբգարյանը ստեղծում է սյուրռեալիստական աշխարհ, որտեղ ծանոթ կերպարները տարրալուծվում են տեսողական կլիշեների մեջ։ Առերեսվելով պոստմոդեռնիստական մշակույթի «սնամեջությանը»՝ նա փորձում է գտնել ունիվերսալության նոր ձևեր և տեխնոլոգիական ճնշման տակ առաջացող իսկական զգայական փորձառություններ։ Համադրող՝ Վիգեն Գալստյան Ներկայացված է «Հեռապատումներ» ծրագրի և AI Days 2026 համապետական նախաձեռնության շրջանակում։ Ցուցահանդեսը կգործի մինչև նոյեմբերի 29-ը։ Մուտքը՝ պատկերասրահի տոմսով։