ReA 2026 փառատոնի դիպլոմային ֆիլմերի ծրագիր 1։ Ֆիլմերը մասնակցում են մրցույթին և գնահատվում փառատոնի ժյուրիի կողմից։ The Little Train, ռեժիսոր՝ Angel Wang (ԱՄՆ · 3:38 րոպե) Տարիներ շարունակ ծառայելուց հետո փոքրիկ սուրբծննդյան գնացքը հայտնվում է աղբում ու մոռացության մատնվում։ Կկարողանա՞ այս դեն նետված խաղալիքը վերափոխվել ու գոյության նոր իմաստ գտնել։ MagiMart, ռեժիսոր՝ Abe Enoch (ԱՄՆ · 4:20 րոպե) Մեր աշխարհից ոչ այնքան տարբեր մի կախարդական աշխարհում կա MagiMart անունով մի հսկայական խանութ, որտեղ զոհաբերության համար նախատեսված մի այծ անշտապ խոտ է ծամում։ Եվ սկսվում է զավեշտալի իրադարձությունների մի շղթա։ The Land Keeps Watch, ռեժիսոր՝ Iryna Tanasivchuk (Էստոնիա, Ուկրաինա · 7:52 րոպե) Կենդանի Լեռը ընկերանում է Արշավականի հետ՝ ի պատասխան նրա բարի արարքի, բայց շուտով պատերազմ է բռնկվում ու բաժանում նրանց։ Պատերազմը տեսնում ենք կենդանի բնապատկերի աչքերով, որը մարդկանց պես տառապում է ու ոտքի կանգնում՝ իրեն պաշտպանելու համար։ Silence, ռեժիսոր՝ Yoona Hwang (Հարավային Կորեա, ԱՄՆ · 3:01 րոպե) Տացետը՝ չարաճճի, արվեստասեր մի խուլ տղա, երաժշտական համերգը վերապրում է յուրովի։ Նա ամուր գրկում է փուչիկը՝ բեմի թրթիռները զգալու համար, ու ձայնային ալիքները վերածում վառ պատկերներով լի ճամփորդության։ Մինչ փուչիկի ներսում պարում են աստղաձև թղթիկները, Տացետի երևակայությունը սավառնում է բամբուկի անվերջ անտառների ու վերացական ձևերի միջով։ Երբ երաժշտությունն ավարտվում է, նա միանում է հանդիսատեսի ծափերին՝ ձեռքերը վեր բարձրացնելով ու թափահարելով․ այդ «լուռ ծափահարությամբ» նա տոնում է ձայնի սահմաններից դուրս ծնվող ներդաշնակությունը։ Each, All and Every, ռեժիսոր՝ Nikoletta Veress (Հունգարիա · 11:29 րոպե) Պարոն Ճագարը չի կարողանում որոշել՝ ինչ դառնալ, երբ մեծանա։ Ընտրության առատությունից շփոթված՝ նա ապաստան է գտնում երևակայության մեջ ու ստեղծում իր փոքրիկ կրկնօրինակներին։ Հետևելով նրանց՝ նա բացահայտում է հնարավորություններով լի մի նոր աշխարհ։ Ամեն ինչ հրաշալի է թվում, մինչև մի ճակատագրական սխալ․ իր իսկ մեղքով նա կորցնում է հնարավորություններից մեկը։ Այդ կորուստը կլանում է նրան ամբողջությամբ։ Balance, ռեժիսորներ՝ Diego Sáenz, Laura Franco Santos (Մեքսիկա · 6:26 րոպե) Մարդակերպ ռոբոտ սամուրայը, իր անճարակությունն ու նախորդներին վարպետությամբ զիջելը ողբալիս, պատահաբար ազատ է արձակում իր զինակիցներին սպանած չար ոգուն։ Այժմ նա պետք է գտնի նրան հաղթելու միջոցը։ The Panic Inside, ռեժիսոր՝ Matthias Strasser (Գերմանիա, Շվեյցարիա · 8:33 րոպե) Ինչպե՞ս է բոլորին գոհացնելու սովոր մարդը, որը չի կարողանում մերժել ընկերների անվերջ խնդրանքները, վերջապես սովորում սահմաններ դնել, վստահորեն «ոչ» ասել ու վերագտնել իր ազատությունը։ Dorian, ռեժիսոր՝ Julia Borkowicz (Լեհաստան · 10:29 րոպե) Ֆիլմ՝ Օսկար Ուայլդի «The Picture of Dorian Gray» վեպի հիման վրա։ Գլխավոր հերոսը՝ Դորիանը, հայտնվել է հավերժական երիտասարդության թակարդում ու պայքարում իրեն կլանող մենակության և տագնապի դեմ։ Here and There, ռեժիսոր՝ Kora Lee (Ավստրալիա · 2:37 րոպե) Երբևէ հեռացե՞լ եք հարազատ միջավայրից՝ նոր վայրում ամեն ինչ նորից սկսելու համար։ Here and There-ը պատմում է մի աղջկա մասին, որը տեղափոխվում է այլ երկիր ու բախվում նոր կյանքին հարմարվելու շփոթությանը, ընտանիքի կարոտին և աշխույժ սրճարանում իրեն շրջապատող լեզուն չհասկանալու մենակությանը։ Ինքնուրույն ապրելու և իր տեղը գտնելու ճանապարհին նա բացահայտում է, որ նույնիսկ ամենադժվար պահերին մենք երբեք իսկապես մենակ չենք։ Wet Shoes, ռեժիսոր՝ Pauline Vassal (Ֆրանսիա · 10:00 րոպե) Գարեջրատանը տեղի ունեցած ընդհարումից հետո երկու մտերիմ ընկեր գիշերն անցկացնում են կալանավայրում, և նրանցից մեկը սկսում է վերանայել իր տեղն այդ ընկերության մեջ։