«Կոնֆլիկտների կառավարում»–ը «21-րդ դարի գոյատևման հմտություններ» շարքի աշխատարաններից է։ Ի՞նչ անել, երբ խոսակցությունը վերածվում է վեճի, կամ երբ անընդհատ հետաձգում ես կարևոր մի խոսակցություն։ Կփորձենք հասկանալ՝ ինչ կա անհամաձայնության հետևում և ինչպես պատրաստվել դրան։ Harvard Negotiation Project-ի «Յոթ տարրերի» մոտեցմամբ կսովորենք տարբերել դիրքորոշումն իրական շահից, տեսնել այլընտրանքները և հասկանալ՝ ինչ է պետք, որ պայմանավորվածությունն աշխատի երկու կողմի համար։ Խաղարկվող իրավիճակների ու քննարկումների միջոցով կփորձենք լսել, նվազեցնել լարվածությունը և գտնել հնարավոր հաջորդ քայլերը։ Բեր մի դժվար խոսակցություն, որը կուզեիր ավելի լավ հասկանալ։ Նախնական փորձ պետք չէ։ Աշխատարանը վարում է Արթուր Մարտիրոսյանը Արթուր Գ. Մարտիրոսյանը CMPartners-ի (Քեմբրիջ, Մասաչուսեթս) ավագ խորհրդատու է և բանակցությունների մասնագետ՝ 30-ամյա փորձով։ 1994-ից տասնութ տարի աշխատել է պրոֆեսոր Ռոջեր Ֆիշերի՝ Harvard Negotiation Project-ի հիմնադրի և «Getting to Yes» գրքի հեղինակի հետ։ Նա նախագծել և ղեկավարել է բանակցային ծրագրեր աշխարհի ամենաբարդ հակամարտություններում, ինչպես նաև վերապատրաստել Fortune 500-ի տասնյակ ընկերությունների մենեջերների։ Ունի միջազգային հարաբերությունների մագիստրոսի աստիճան Yale University-ից։